ဝါကျင့်ကျင့်ခွက်ထဲကို
မီးဆလိုက်တွေ ထိုးထည့်
ရွှေအိုရောင်ကောင်မလေးတွေ လှတယ်။
လူတွေမှာ
ဖြစ်တည်မှုနဲ့ အနှစ်သာရ
ခဏ
ငါ
ကိလေသာတွေ ရွက်လွှင့်နေတယ်။
မနေ့က
ဘုရားသွားတယ်
၎ သင်းမောင်း ပေါက်တယ်
ကားတစ်စီး ပွဲဖြစ်တယ်
ချစ်သူက ဖုန်းလှမ်းဆက်တယ်
ချာတိတ်! "ပန်းတစ်ကုံးလောက်တင်ပေးလိုက်ကွာ"။
"ညီမလေးက အလုပ်ဝင်တာမကြာသေးဘူး"
ရေပေါ်ဆီအလှတရားနဲ့ မျက်ခွံထက်မှာတလက်လက်တောက်လို့
ကော့တေးတစ်ခွက်ကတော့ အခန့်သားသူမရှေ့မှာ။
"မင်းအရမ်းလှတယ်ကွာ"
"ခဏနေရင် တစ်ပုဒ်တက်ဆိုအုံးမယ်နော်ကိုကြီး"
"မိသားစုကို အနုပညာနဲ့ရှာကျွေးနေတာလေ"
ချာတိတ်! "ဝီစကီ ၂ ပတ်ချပေးပါ"။
သစ်ပင်တိုင်းမှာလည်း ငှက်လေးတွေတစာစာ။
ငှက်ကလေးတေးဆိုတိုင်း
မျက်ဝန်းတွေက ပိုက်ဆံအိတ်ထဲဝင်ချည်ထွက်ချည်။
လက်ဖက်မစားထားရင်တော့
ခင်ဗျား မလာနဲ့။
အဲဒီရပ်ဝန်းမှာ
မာယာတွေအပြည့် မာနတွေအရှင်း။
အရွယ်စုံ အကျင့်စုံ အသံစုံ။
ကားတစ်စီးထိုးရပ်တိုင်း ငှက်သံတွေကပိုပိုစွာလို့။
ဖန်ခွက်ချင်းထိခိုက်သံကြားမှာ
သိက္ခာတရားတွေ လုံးပါးပါးတယ်
အကုသိုလ်တရားတွေ မွေးဖွားတယ်
ဒီလိုနဲ့ပဲ လုံးချာလည်လိုက်။
အဝင်ဝမှာ ကိလေသာကိုပန်းကုံးစွပ်ဖို့
ကျုပ်တို့ဦးညွတ်ပေးကြ
ရမ္မက်ခိုးတွေဝေကျနေတဲ့ ကမ္ဘာ
ကျားဖမ်းမုဆိုးတွေတောင်ပါသေး။
ဒီလိုနဲ့ခါးကိုင်းလာနေတဲ့ မဟူရာညမှာ
"ကဲ ကျုပ်ပြန်တော့မယ်ဗျာ"
ဝိတ်တာရဲ့မျက်လုံး ကျုပ်အပြုံးကိုသိသလို
အပြန်လမ်းမှာ ငှက်တစ်ကောင်ပုခုံးထက်မှာလာနားတယ်။
တိုက်တိုက်ဆိုင်ဆိုင်ပဲ
အမေ့ဆီကဖုန်းဝင်လာတယ်
"မဟုတ်တာတွေ မလုပ်နဲ့သားရယ်"။
No comments :
Post a Comment